Al scür da l’America o al viag da la Maria – 5.a puntata

Silvia Corfu propone una storia a puntate, scritta in bregagliotto. Ogni mercoledì, fino al 22 marzo.

E Las Vegas as pò dir ca la Maria l’era riväda quasi par sbaglio! Sa nu la vess giü tema incura ca l’é riväda e Los Angeles da nöc forza l’à füss indacia ent ün’altra direziun. Ma uramai l’era e Las Vegas e la prüma roba ca l’à fac l’é giü üna bela drumida itant c’al däva al sul e l’é indacia e spass da nöc. Senza indär ent i grangi palaz, casinò e utei, l’à giraa par Venezia, Monte Carlo, Parigi, Berlino, Londra e New York. Tüt quel kitch!

Quel ann dal se viag al custäva poc e indär in America e inscia l’à inscuntraa gent ca i eran e Las Vegas parciè ca l’era bun marcaa! Ma intant ent l’ultel l’avdü c’as pudäa indär e avdeir al Grand Canyon cun ün busin da lusso. As partiva e lan seisc la duman e as turnäva indrè la seira tard. Al viag al stravarzäva al deserto e la guida la vess pö quintaa sü vargot.

Inscia lee, doi giapunesin e üna copia dal Vermont i en partì al dì dopo par uran e uran da deserto, uran e uran da film c’al chauffeur dal busin al väa decis da fär avdeir. Inscia l’é riväda el Grand Canyon c’un la teista c’ai giräva e nu l’à capì sa incura ca l’avdϋ quelan muntagna ca invece ca indär verz al ceil l’ingiävan in giò, la stornina la gniss dal viag in bus o dal fatto ca l’era in pè e la guardäva giò’n t’ün gran valun! E lee ai plasceäa e caminär e ϋn ann la väa panzaa da fär ϋna caminäda ent al Grand Canyon doma ca, incura ca l’era sün l’ur da quel gran valun e la cuntempläva quelan scarpäda da crep brϋn quasi aranc, à ie pasaa la vöia.

As avdäa ϋna strädina in pè ca pasäva giò, giò fin e l’aua dal Colorado ca dal canugiäl al paräa ϋn’aua periculusa! Al canugiäl ai al väa prastaa üna guida dal Grand Canyon, ϋn om veil cun üna gran barba ca l’à dic ca lϋ l’ingiäva giò’l canyon doma da nöc parciè ca dal dì l’era trop cald!

L’ültim dì e Las Vegas e ündasc minϋt dré da lan ündasc l’ündasc da nuembar (l’ültim dì da la prüma guera mondiale) l’à guardaa ex-suldaa da lan tanta guera ca marciävan el sun da tantan banda da fanc da scola, fian cun bandiera e altri fanc cun cià slupet! Incura ca l’à dumandaa e üna doneta parciè ca i fanc i väan cià slupet la doneta la dic: “ie sper ca i säan mia cargaa” e pö la spiagaa ca in America tanci fanc da scola i an la pusibilità da veir ün’educaziun pre-militari. In mez e la gent l’avdü ün omun cun üna maglieta cun sü scric: “Freedom is not free”!

Ultima puntata mercoledì 22 marzo.

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.