Metà d’agost

Inciö ie penz e lan dona ca tanco ie l’an da metar davent guat, züchet, mangold e tantan altra verdüra. Da prümaveira as semna e as spera ca la roba la vegna ben. Al prüm lan plantina la stentan e gnir granda, ma tüt da colp la ‘s rinforzan e pö magari al vegn ün periodo da plöiva…


Che surpreisa incura ca’s torna ent l’ort: la salata l’é pronta e inura par diversi dì as manga salata e mesdì e er la seira!
Da lüi la madüran lan alzua (ügheta giò Sotporta). Quista volta ie ‘n à mia giüda; scu ie à da fär la cunserva, parcié ca l’é la preferida dal Guido.

Pö al vegn al temp dii züchet! As ai po’ fär in tanci modi e i en propi bun, ma dopo qualci dì i vegnan quasi or da lan ureila e as scumenza ei metar e gialär.

Issa l’é al temp dii guat. I en bun in salata, rustrii cun panzeta o in fartemf… E pö as scumenza ei metar davent par l’invern.
Cun paragiär quistan roba, as as incorg ca l’atonn l’é mia dalonc. Par quel l’é mear e godar l’ültim cald e l’astäd ca quist’ann l’à mess e gnir…

La scumenza la scola e ie augur ün bun inizi e tüci fanc e er ei maestar.

Renata Giovanoli-Semadeni