Festa dadora

L’astät l’é al temp da lan festa dadora. Ai é ci ca fa da mangär sül grill e ci ca fa picnic ent al bosch. Inscia as prufita dii dì lungh e as god la natüra.

Er lan festa naziunäla la vegnan celebräda d’astät ent quasi tüc i pais dal mond: la nossa al Prüm d’Agost. L’é l’ucasciun par incunträr gent, da solit quii dal pais ca ‘s vé da rär ent al corz da l’ann. As manga üna servula o ün toch torta e as stà ün mument in cumpagnia e guardär al fögh ca brüsgia.

La festa dal pais, urganizzäda da quii dal “hockey” l’é ormai üna tradiziun. Quist ann i l’àn facia ora Caltüra e i àn giü üna gran furtüna cul temp. L’é l’ucasgiun par incunträr la gent da la val e quintär sü lan ültima nutizia. As ciancia da roba semplice, ma mia banäla: al fegn ca l’é ormai ent al tublaa, i bes-c sün l’alp, i fanc ca i en tornaa e ciäsa par lan vacanza cun cià i neudin o üna flur speciale ca flurisc par la prüma volta…
As vé i giuan cresciü e i fancin o i popin nasciü da poch: qualci i mövan i prümi pass, i altar i guardan cun i se öilun or dal carozin o or dal sachin tacaa sü davant el bap o ela mama.
Par i fanc pü granc ai é giögh da provär ora o surpreisa da crumpär…

Um à giü üna prümaveira bagnäda, ma dopo, l’astät l’é giüda bela e calda. Issa i dì is en già s-ciörtaa; al sul al vegn già sü ün’ura e meza pü tard!
Par furtüna ogni stagiun la porta i se bii mument e am as pò già ralagrär sünt i bii calur da l’atonn.

Renata Giovanoli-Semadeni