L’é cià la prümaveira

Buna prümaveira e tüc da la Renata.

Inciö al plöv, ma i disgian ca la prümaveira bagnäda nu la sbaglia mai.
La prüma creatüra ca ie à avdü eir duman, l’é giü ün merlo ca l’é scolaa davent gion l’ort, incura ca ie à zaraa al balcun da la nossa cambra. Magari al väa in boca ün vermin o forza l’é soma fugii davent. Ün mument pü tard ie l’à santii scivlär vil praa daspair la Maira.

Lan ronzla la sgolan ligeira intorn lan ciäsa dal pais, ciarcand da ciapär lan prüma mosca e ora Barnöv i quintan ca i àn già santii al cucù.

La satmana passäda ent al läghet ai era ent du ragna e doi dì dopo ie à avdü qualci grap da öv ca galagiävan sün l’ur da la riva.
Gion l’ort l’é flurii lan primula gialda e rosa, i narcis giald e i giacinti blavet e rosa. I àn bii calur, belan forma e is fann capir ca er al cald plan planin al gnirà.

Ma er ent al sito LaBregaglia.ch ie vez sempar da növ belan roba: foto da gent veila, da parsuna da mezz’età e da giuan da la nossa val ca mossan ragna, caprioli, l’upupa, vaca: bes-c sulvadagh e dumestich; al vent, la ciäga, la lüna, l’aua…

Quisti i en segn ca fann avdeir al güst ca la nossa gent l’à da pudeir vivar ent üna val cun üna natüra inscì bela e mia cuntaminäda e ch’i lascian sparär ca l’amur par la creaziun al crescia e al giüda e rispatär i bes-c e er e salvär la nossa Tera da l’inquinament.

Sa varün al vol dir vargot, al pò scrivar du parola sota e quist articul o mandär qualcian riga diretament e ie. Am fagess plasgeir santir i voss panzeir sün quel ca ie scriv.

Renata