Ün famus caciadur d’la valäda,
Ün täl fidigh nu ‘s trova in giurnäda,
E ‘n bel om travarsä ma pitet,
L’era Indrea Piznun dii Pignett
Sempar svelt dai dai al caminäva,
Fadigä ni stäncal mai as l’avdäva;
‘l veva ün pè tancu quel dii camocc :
L’è passä minca crep, minca trocc.
Muntanela ni camocc nu fügiva,
Sa ‘l Pignett cul slupett ai seguiva.
Ma l’ann milottcentsesciantasett
L’à sbranä ‘n orz sett ciott per dispett;
E ‘l Pignett al trumbun in män bränca,
Va cul fi. E quel orz al fic nu mänca!
In poch temp i rivan sü Sascfurä,
Ent la baita ‘l pastur s’è sarä.
“Quanti pegor ga l’orz già sbranadi?”
“Mi so nient, le go minga cüntadi.”
Proseguend al viag quas’ in brancun
I rivan vers Cengal süi Cantun,
E i usservan fra mez ‘na buschina
Poch dalong ‘s mövar qua’ selvagina.
Caciadur, curag’ in sto mument,
E puls franch e cun öl ben atent!
Chilò ‘l fi s’è tirä d’üna banda,
E ‘l se bap, s’è purtä vers ‘na ganda:
E dree ‘n cräp ‘l à splanä ‘l se trumbun:
Fo dui colp, ca rabomban scu ‘l trun.
L’orz cun quel’improvisa scotäda
Al banduna cunfüs la se gnäda.
‘n ältar colp e ‘l la stend sün quel bälz,
Ma ‘l rudäla e ‘l sparisc ent i drälz.
Intant ca ‘l caciadur e tüt pröva
Quel orzatt al cerca, ma nu ‘l tröva,
(- Ent ‘na trona fra i bocc l’è sparii
Quel orzatt e truvä l’è pü nii -) |
Sü pel cräp, cun ün po’ d’ trämlaräla,
Al giuvnet cun grand rüg in canäla:
“Bap, sül fil, ün ältr’orz biär pü grand,
Cul pel driz, al täracc sta sgrafand!”
E quei sbrag, al bap spert, ma cun flema,
E quel’orza ‘l regala du gema;
E senza tanci e grand cumpliment,
Tupicand croda quel gross arment;
E pastand brävament la se gnüca,
Rac e fred as ferma sü ‘na ciüca.
Da Laret e da Lera i canoscent
Pel trasport da l’orz vegnan gügent;
Imbelii da flur portan sta belva
Fin ei Crott da Bond dasper lan selva;
Bun rinfresch ciapan dal caciadur,
Varian sciopa d’vin godan d’ün sciur.
Al Pignett cun sta cacia ‘l mazäva
In Bundäsca i driän orz d’la valäda.
Erico Picenoni
|
Commenti recenti