Impurtant l’é al contenuto, mia l’ortografia

Ie à aciataa cun plasgeir la pruposta da la redaziun da La Bregaglia da metar ent tuci meis vargot in bargaiot ent al se sito. Par scumanzär, ie à portaa la puisia Al linguac d’la mama, ma ie vuless mia doma gnir cun roba d’üna volta e senz’altar mia doma cun scric da Surporta. Ie sper ca er quii da Sotporta e i bargaiot ca stann davent i säan dispost e ‘m där ‘na man par implenir quisto spazi.

Sa uv registrà, u pudé scrivar i voss panzeir diretament sot i singul articul (in bargaiot o er in taglian)!

Sa inveci u vé qualcian idea par fär ün contributo pü lungh, am al pudé mandär par posta: Renata Giovanoli-Semadeni, 7603 Vicosoprano o träs la posta elettronica e quisto indiriz: rengiosem@gmx.ch

Ie scriv tanur lan regula dal Luigi Giacometti, ma vualtri u pudé scrivar incusa ca ‘v vegn spontaneo. Impurtant l’é al contenuto, mia l’ortografia!

Issa am sé prest rivaa e la metà da mag.
L’é già qualci dì ca ‘s sent e cantär al cucù. I pit da lan prüma nigäda dii passar ca vivan sot al tec da la nossa ciäsa i àn già bandunaa al nigh.

I pescadur i varann scumanzaa e indär la seira e pascär e i passarann bii mument caminand sü e gió dree lan nossa aua.

Tanci bargaiot, specialment quii da Sotporta, i varann già cavaa e samnaa l’ort. Am pär sempar bel, lasciär crodär i asment ent la tera neira, calda e mulasgina, ai cuatär sü, ai där üna bagnäda e am figürär incusa ca i scumenzan e fär risc e pö du föiina ca furan la tera e crescian sü par salüdär al sul e la luce.
Incura ca ie fac quisti laureri, ie penz e l’Elvira da Sotpunt ca la sà tantan roba e sa u vé dumanda sül modo da cultivär flur o verdüra, ie ‘v dun al consiglio da dumandär e le.
E Visavran la Sonia l’à samnaa già preist flur e verdüra ent la sera e issa l’à già raplantaa la verdüra ent l’ort da Visavran e paragiaa lan casciota da flur da portär e Löbia par guarnir la stalina daspair la si ciäsa. Ün dì l’am à dic:”Tegn in ment, ca incura ca tü semna cun asmentin pit e ligeir, t’à dai cuatär cun tera fina fina e la metar sü tanco metar al casgiöl sgrataa sü la roba da mangär”.

Cultivär l’ort al dà sudisfaziun, as parmet da stär ent la natüra e pö as dà la pussibilità da mangär früta e verdüra sana e fresca.

Ie augur buna pesca ei pescadur e ün polasc verd e tüc quii ca fann dree i ort!