Vev scumanzaa ben l’ann növ?

Nualtri scì, ma mia fagiand lan ura pita, cun mangär e bear, no, quista volta am sé indac ent la Val Müstair e guardär la tapa dal Tour de Ski. Al temp l’era bel, sü par al pass am à incuntraa doma ün auto e sün Malögia am à già trovaa al sul.




Passand gió par l’Engadina al trafich l’era scarz; la gran part da la gent la varà anca durmii. Am väa dasmancaa ca da Zernez fin Tschierv ai é ben 27 chilometri, ma am sé mia gnii stüf, i albar cuataa da neiv, la sträda ca ‘s tira e la lunga sün tantan storta e la musica alegra dal Radio Rumanc as àn dac l’impresciun da indär ent ün mond fataa.

Rivaa e Tschierv ai era bandiera, strisciun e gent alegra ca däva al benvenuto; tüc i eran cuntent da veir podü urganizzär quista feista. Dopo veir mangaa pizzocal da la val Müstair cundii cun panzeta, gabusc e flur am sé indac e guardär la pista par as fär ün’idea dal laureri c’ai é dadree el tüt. Ie penz el laureri dii urganizzatur ma er dii alenadur, da quii ca vaxan i schi e e lan ura ch’i atleti i drovan par as scaldär ent. Cun essar sül lögh as à ün’idea da quant ca l’en impé lan salida e lan discesa e da quant ca la pista l’é strecia, specialment ent lan storta, indua ca i curidur i àn da där e där par rivär da stär impé.

La corza stessa l’é giüda interessanta e al Dario Cologna – l’om ca l’à fac gnir cun lan sii bela prestaziun da i agn passaa e la gent da la sii val la vöia d’urganizzär al sprint – l’à mossaa la sii classa. Mia soma lü, er i altar giuan e giuvna i en gnii incuragiaa e aplaudii e tüc i àn aprezzaa al sé impegn.

E lan seisc el clair da lan luce am sé partii par turnär e ciäsa, cuntent da veir passaa ün dì diferent e da veir pudü partecipär e la feista dii noss cusgin da la Val Müstair.

Renata Giovanoli-Semadeni