Ma che bel’astäd!

Am god quist’ann tüt quel ceil blavet e quel sul ca l’ann passaa am à mia giü. Da favrair la gent da Caltüra la cuntinuäva e dir ca ‘l Eduardin al gèa ca dopo ün invern da vent al vegn üna bela astäd. Ie è cradü e quel’idea e l’à funziunaa.

Al noss Cumün (ca e la fin dii quint am sé tüc nualtri) l’à ciapaa al premi Wakker par la ciüra ca’l dedica el mantegniment da lan ciäsa e dal paesag e i turista i vegnan e visitär i noss bii paiset.
Ma i laureri ca ‘m fa i en al prüm da tüt par vivar ben ent lan nossa ciäsa e par unurär l’eredità ca i noss bun veil is àn lasciaa. E am à mia da dasmancär al laureri ca i noss cuntadin i fann ann par ann cun pasculär, cultivär e sagär – incusa ca la disc la canzun – i noss pascual, munt e praa. Senza al se laureri am füss saraa ent dal bosch…

Al 22 d’agost am festegiarà tüc insemal al premi Wakker e am varà er la pussibilità da assistar e ün cuncert dal grüp dal Davide Van De Sfroos ca ‘l fa musica popolare part gran part in dialet lumbard. Ie penz ca ‘l sarà ün’esperienza növa par tanci da nualtri!

Soi al riscia da gnir elegiü al pais pü bel da la Svizzra, l’é ent i prüm növ da la cuncurenza, e inura al gnirà anca pü canusciü…

Er sa la situaziun economica l’é mia da lan pü buna, ie crech ca tüt quistan roba la portan tantan oportunità par nualtri ca ‘m à güsgent la nossa val e ca ‘m as rend quint da quant ca ‘m sé furtünaa da pudeir vivar chilò.

Ie augur una buna e bel’astäd e tüc.

Renata Giovanoli-Semadeni