La festa da la brona

Incusa ca ie vea scric ent al meis da dicembar, al liciun da la nossa brona da Ca d’Zambar issa al torna e bütär or aua. Al Stefano Salis, ca ‘l laura par al cumün, l’à cercaa ün tap növ e l’à cunciaa ent lan sfessa ca ‘s eran formäda ent la vasca da sasc e inscìa, davent dal meis da mag, la nossa brona la canta torna.


Par festegiär, sanda dreemesdì, am à fac üna marendina. Tüc i àn portaa vargot da mangär o da beivar e am sé stac ün mument in buna cumpagnia. Inütil dir ca ‘m à parfin cantaa…

Er la Lisetta Müller e la Silvia Tön ca ent i ültim 4 o 5 agn as santävan gió in facia e la brona e quintär sü, sperand d’avdeir anca la brona plena d’aua fresca, l’àn pudü partecipär. I se fanc al an àn töcia sü da Flin e inscìa l’àn pudü avdeir cun i se öil e santir cun lan si ureila l’aua ca scor da növ.

Cun guardär leir dua, ca l’àn anca baivraa lan si norza e vaca sü da quista brona, am é passaa par la ment quanci cambiament ca ‘i é giü ent la nossa fraziun ent i ültim agn: cinch stala l’en stacia trasformäda in ciäsa e almeno du ciäsa issa l’en gnida vendüda e gent da davent.
E quanta gent ca l’é gnida e mancär; i veil i en mort ora e i giuan i en indac davent e ciarcär laureri e i tornan par fär vacanza o, l’ün o l’altar par stär, dopo essar indac in pensiun.

Incura ca ‘m fagea spass da fanc, am ingea mia pü in sü che la brona, parcié ca là al pais al sciünäa. Ent al corz dii ültim 35 agn da là in sü l’é nasciü üna fraziun növa, i àn fac sü diversan ciäsa, sa ie à quintaa ben, l’en almeno 14!

Inscìa l’é la vita. Tüt ca scor, tüt ca cambia e ent ün modo o ent l’altar tüt as ripet…

Renata Giovanoli-Semadeni

Ie à già ciapaa al me prüm ragal da Nadäl.