Sträda saräda

Di Renata Giovanoli-Semadeni.

Incura ca, tanco eir e inciö, i säran la strada intrantar Plan da Lägh e Malögia, am vegn in ment üna volta ca am vuleiva tornär cià da Zuoz e la sträda l’era saräda.
Stär davent al fin sadmana l’era par ie üna tortüra!
Almeno üna volta e la sadmana ie vuleiva tornär e ciäsa, mangär e meisa vargot da chilò, indär e spass cun la Lady (al noss cane lupo) e durmir ent al me lec.
Quela sanda l’Anna, la Laura, l’Andrea, al Romeo e ie am sé partii da Zuoz fiducius. Rivaa e San Murezzi am à incuntraa al Fabi, al Marco e la Daniela ca gnivan ent da Coira. E la posta is àn dic ca la posta la circulèa mia.
Ci ca vèa giü l’idea ie nu sà mia pü, ma am à dumandaa e ün taxista quant ca al vess prateis par as manär e Sei.
„40 franch“, l’à raspus.
Am era in 8. Al gniva ora 5 franch par ün.
Am à decis da tör al taxi.
Rivaa e Sei, i mac i àn töc sü ün päl da la neiv e il àn fac passär träs i managh da lan nossa tasca. Pö as l’en mess in spala e i en partii cun grangi pass in direziun da Plan da Lägh.
Nualtran fia am sé tocäda dree riand, parcé ca al Marco al cantäva: „Viva la Bregaglia“.
Rivaa e Plan da Lägh am à telefunaa e ciäsa (ai era mia anca i telefunin) e doi bap as àn dic ch’i füssan gnii es tör e Malögia.
Al Giorgio Walther as à menaa e Malögia cun al se auto e da là am à pudü tornär e ciäsa.
Anca iss, cun scrivar quistan riga, ie tir ün suspir da suléiv…
Dree üna bela marenda, ca la mama la paragiäva sempar par i se tre fii ca i passäva la sadmana davent da ciäsa, ie à fac üna bela caminäda cun la Lady. Vers lan cinch, ie sun pö indacia e där ün ciüt ent la stala dal Giacum e la Sonia.
Quela nöc ie à durmii propi ben e al dì dopo lan bataria l’eran cargäda par resistar ün’altra sadmana davent da ciäsa.