Ün üsc mezz evert

Di Renata Giovanoli-Semadeni.

Davant ie, ie vezz ün üsc mezz evert.
Cossa vularàl dir?
Varàni dasmancaa da ’l sarär?
O varàni lasciaa ent üna sfessa par ca al gat al possa indär ent e ora liberament?
D’astäd, ün üsc evert al parmet al ricambi da l’aria; inscìa i mür freid is scaldan e la ciäsa la riviv.
D’invern, parò, l’aria fresca la rend i mür anca pü gelt.
Pö ie penz ca magari ent la ciäsa i àn pizzaa la pigna e ca ’l fögh l’à dasbögn d’aria par ciapär sü ben…
Ün üsc evert al pò vuleir dir, ca quii da la ciäsa i specian visita e ca is ralegran d’acogliar varün ent la si stüa, par as santär gió e stär ün mument  in cumpagnia, magari mangand insemal ün bun toch torta.
Pürtrop ogni tant am vé ün üsc evert e am penza d’indär ent par prufitär da l’ucasgiun ca ’s presenta, ma quel as sära da colp, bel in facia!
Al prüm mument am resta parpless, pö am à da panzär, ca ent la nossa vita, incura ca ent ün lögh as sära ün üsc, da ün’altra banda as zära ün balcun!

Renata Giovanoli-Semadeni