Bregagliotto, Cultura, Home, a-GRit

Par la fin da l’ann

30 dicembre 2017 3 commenti

Di Renata Giovanoli-Semadeni.


Ie ’m sun incorta ca l’é ün gran pezz ca ie nu scriv pü nagot in bargaiot. Quel ca l’é sucess gió Bond as à tüc ün zich blocaa. Ogni tant ie panzäva da scrivar vargot, e pö al gniva scric o dic vargot sü la frana e quel ca ie vess scric am paräva mia pü impurtant.

Ie crech ca sa’am penza el 2017 am pò cianciär da ün periodo prüma e ün dree dal 23 d’agost.
Fin là am vèa giü üna bel’astäd cun tanta gent ca fagèa lan si vacanza in Bargaia. Dree tanci i en partii e nualtri bargaiot am à funziunaa.
Al dann l’é giü grand, ma tüc i àn fac la si part. La culaburaziun l’é giüda impurtanta e lan roba l’en stacia facia cun testa e impegn.
Impurtant l’é giü al laureri ent i büro, ma er quel cun lan machina c’àn scavaa e portaa davent tüt quel matariäl. E pö al sforz da quii giuan da la Protezione Civile ca i àn töc ora tüt quela palta or da lan canva e or da lan ciäsa! As disc ogni tant ca la giuvantüra la ’s impegna mia, ma chilò am à avdü ca l’é mia vera! Che bel esempi!

E Visavran am à giü chilò diversan dona suleta, oman e famiglia cun fanc ca i àn passaa chilò ün periodo pü o meno lungh ent ün o l’altar apartament.
Incura ca ’m as incunträva am quintäva sü e am ciarcäva dai fär curagi… Ma i eran già curagius… e quel ca ’m é rastaa, l’é la solidarietà ca i vèan tra da lur e la fiducia ent lan rasposta ca i vessan ciapaa dree man.

Ie crech ca sa am vess da trovär üna parola ca caraterizza al 2017 in Bargaia, quela la füss SOLIDARIETÀ.
Granda l’é giüda quela tra da nualtri e impurtanta quela sentida da tüt la Svizzra e l’à fac tant ben.

Incura ca ie era üna mata da scola, l’ültim dì da l’ann am cantäva sü lan plazza da Visavran la canzun Fratelli finito è già l’anno
Pürtrop incura ca i àn unii lan secondaria la tradiziun l’é crodäda.
E la fin da l’ann ie penz sempar e quii mument incura ca tüc i fanc da scola i cantäva insemal, formand ün bel coro, e ie cant par ie (ün po’ sotavusc, parcié ca ie nu sun mia pü üna buna cantarina) lan 3 strofa da ringraziament el noss Creatur ca la sciünan cun lan parola:
E facci la grazia che in quello (l’ann növ) vivendo o morendo siam tuoi.

Üna buna fin e ün bun principi e tüc da la Renata.

Attualmente ci sono 3 commenti

  1. scrive:

    Grazia par l’aprezzament.
    Lan parola ie lan vèa scricia e la fin dal 2014.
    As lan pò trovär sot: Cultura, dialetto bregagliotto, e indär indree qualcian pagina…
    Renata

  2. scrive:

    a le propri vera ……bei pensee…… mah scrivila tuta la canzun ………… bun ann a tucc

    luciano

  3. scrive:

    Brava e bun an er e tü.
    Celina

Commenta questo articolo








3 + due =

Meme made in Bregaglia

La vignetta della settimana

V52

Guardala.