Al scür da l’America o al viag da la Maria – 3.a puntata

Silvia Corfu propone una storia a puntate, scritta in bregagliotto. Ogni mercoledì, fino al 22 marzo.

Al prüm toc dal viag in treno da Reno verz al Pacific l‘é giü interesant parcié ca e Reno le gni ent ün omet cun l‘uniforma da l’Amtrak e l‘à scumanzaa e quintär sü da la storia dal lög incura ca i prümi pionieri i väan inscuntraa gli indiani. Ma la Maria dal vagun panoramic l‘à cuntinuaa e guardär la natüra da lan muntagna da la Sierra Nevada. Che beleza! Tüt da colp però, dopo üna galeria sünsom al pass prüma da scumanzär la discesa verz al Pacific, l‘é gni al caligh e nu s‘à plü avdü nagot. Uran e uran da caligh! Par furtüna ent al treno as pudäa legiar o drumir. E Emeryville, l’ültima staziun dal California Zephyr, e mez’ura da San Francisco al däva torna al sul e cun quel l‘é turnaa al bun umur. E la staziun l’era pront ün busin par purtär la gent dal treno ent al centro da la cità e lee l’à capì ca San Francisco ai vess prubabilment plasgiü propi tant! Al chauffeur l’era simpatic e al väa sϋ üna musicheta alegra.

E San Francisco al 7 da nuembar al paräa üna seira da mag. L’era bel caldin e lan sträda l’eran plena da gent ca ingiäva e gniva, lan butega e i risturant i eran evert e la manestra da pesc l’à güstaa propi tant. Prüma d’indär e drumir l’à fac ϋn giret el porto e l’avdü ca quel bupär ca’s santiva nu l’era mia ün bupär da can ma da lan foca ca l’eran gnida ora da l’aua par passär la nöc sül molo. Ent l’utel l’avdü ün scartabel cun scric sü: “Bike The Bridge” e innura l’à decis ca San Francisco al l’à vess visitaa in bicicleta.

Inscia al dì dopo, la bicicleta töcia e fic pugiäda sül famus punt, ecco ca l’à guardäva giò al blavet da l’oceano, lan barca e vela e lan aquila da la teista blanca ca fagiäan culaziun da pesc. Cun la bicicleta l’à väa crumpà ün bigliet par tunär indre cul batel e inscia l’à giü da pedalär tϋt al dì sü e giò di mot da Sausolito par mia perdar l’ültim batel. Quasi, quasi a ün certo mument l’à panzaa d’as veir perza ent lan collina da la California! Invece pö l’era sül batel da lan set cun tanci altar ca i väan fac al listess viag e, quela seira là l’à gurdaa ün tramonto ross e aranc d’adrè al famus punt e i pelicani ca pascävan la si cena. Al gniva scür incura cal batel l’é passaa davant e l’isula cun la prasciun d’Alcatraz

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.