Al scür da l’America o al viag da la Maria – 1.a puntata

Silvia Corfu propone una storia a puntate, scritta in bregagliotto. Ogni mercoledì, fino al 22 marzo.

Ün dì e la Maria à ie gni la vöia d’avdeir l’America. Lee l’à väa sempar giü la pasciun par la musica americana; la musica da l’Elvis Presley, dal Bob Dylan e, pü tard ent la si vita l‘à scumanzaa e där e ment e jazz e blues da quel pais. E pö quelan storia da cow-boys e indiani ca l’à väa lagiü da mata l’à väan lasciaa üna certa mariveia d’avdeir quel pais dalonc. Ai vess plasgiü e indär da l’est e l’ovest cun ün auto ma, par quel scopo là l’à vess giϋ da veir üna cumpagna o ün cumpagn da viag. Incura ca però l‘à dumandaa in gir, nagiün ma propi nagiün i an dimustraa interess anzi, „cosa vöt indär e fär“ i disgiäan. Innura l’à decis d’indär suleta. Cul treno e cul bus.

L’era l’inizi da nuembar incura ca l’à töc al bus da la cumpagnia Greyhound Toronto-Chicago c’al partiva la seira. Inscia incura ca l’à passaa al cunfini l’era già nöc e, er sa piú o meno l’à saväa indua ca l’ingiäva, l’à prϋma impresciun da quel pais l’é giü al gran scür d’üna nöc da nuembar.

E Chicago l’é riväda la duman preist e l’é indacia dalunga e crumpär al bigliet par al treno Chicago-San Francisco c’al partiva e lan quatar e meza dal dreemesdì. Inscia, dopo veir usarvaa ben, ben la bela staziun dal 1900 c’ai fagiäa gnir in ment la staziun Centrale da Milan, l’é indacia e culaziun ent ϋn café stile anni ’50 e la mangaa öv in pench cun panzeta e tartüfal rustrii. As vuläa santir “americana”! Dopo l’à girunzlaa par Chicago, sota i grattacieli e sϋ e giò da punt rügnent fin in riva el gran lägh. E ogni pass ai gniva in ment lan storia di gangster da Chicago ma intant l’era riväda ent ϋn bel parco e à s’à lasciäda trär ent da la bela architettura dal Frank Gehry. Incura ca l’é indacia ent al California Zephyr, al treno par San Francisco, ai fagiäa mäl i pè dal gran caminär ma però ai e parϋ da veir avdϋ la cità come si deve!

Ent al treno l’à väa riservaa ϋna roomette o couchette e tre past. E inscia l’à scumanzaa la sagonda tapa dal se viag american! Doma ca incura c’al treno l’é passaa sϋl punt dal Mississippi e l’à santì al cor e batar fort fort, l’era gni scür ün’ altra volta.

Leggi la 1.a puntata.
Leggi la 2.a puntata.
Leggi la 3.a puntata.
Leggi la 4.a puntata.
Leggi la 5.a puntata.
Leggi la 6.a puntata.