Viva i 55enni!

Sanda passäda nualtri nasciü ent al 1959 am vea apuntament par festegiär al noss 55esim. La nossa anäda l’era la pü numerusa.

Am sé giü i prüm e scumanzär insemal la 1. secondaria dopo ca i noss genitur e noni i vean decis ent al 1972 da unir la scola. Am era dapü che 40 e par quel mutiv, i vean fac du classa!

Am as é trovaa in 22 (circa la metà) gió Castasegna e da là, ün bus – organizaa da la Freni, ca ‘m ringrazia par al se impegn – as à portaa e Piona, indua ca ‘m à caminaa sünt üna sträda da riciöi, inmez e tanci bii albar verd e belan flur, fin e l’abazia dii fraa ca ‘s trova in riva el lägh.
Dopo veir fac lan solita foto da grüp, am sé indac ent ün restorant e mangär üna buna cena in cumpagnia.

Quista barzeleta as l’à quintäda sü l’Ursula.
Ie l’à trascricia, parcié ca l’as à fac riar, ma er rifletar sül corz da la nossa vita:

Par festegär i se 65 agn, ün grüp da gent da la Val Bargaia l’é indac gió Piona ent ün bel otelet, indua ch’i savean ca i era üna bela cameriera, e mangär üna buna cena. I àn godü la buna cumpagnia, quintaa sü anedoti dal temp passaa, dascorz da quel ch’i fann iss, dii fanc e dii neudin e dascüss indua ch’is pudessan incunträr la prossima volta.
Cun 70 agn i en tornaa là, parcié ch’i savean ca ‘s mangäva ben.
Cun 75 agn i àn decis da indär ent al listess lögh, parcié ca ‘l comat l’era sül listess plan.
Cun 80 agn, quii ch’i eran anca viv, i en anca indac là, parcié ca l’era ün lögh indua ca i eran anca mai giü…

Clica sü la foto par l’ingrandir.

Renata Giovanoli-Semadeni