Nonoleta e pescin ross

Al caldin da quisti prümi dì da prümaveira am àn fac gnir in ment üna volta ca ie era indacia gió Clavena cun i noni da la Stampa. Al nono Gustavo al vea fac tard la patente da l’auto e l’era mia ün grand autista.

L’ingiäva mia tant güsgent cun la si Dauphine blanca indua ca ai era tant al trafich. Parò quela volta as vea portäda fin gió Clavena. Prubabal l’era ün dì da festa, parcié ca l’era in gir tanta gent, qualcian bancarela e vargot ca i granc i clamävan giostra.

Ie penz ca ie varà giü circa cinch agn. Sur tüc i altar bacan as santiva una musica forta. Üna giuvna la cantäva: “Nonoleta, nonoleta per amarti. Nonoleta per uscire sola con te”.
Ie ‘m sun imaginäda ca la cantass vargot par la si nona o forzi er par la mia, la Sina, ca l’era là cun ie. Nonoleta par ie l’era üna forma da vezzegiativa dal vucabul nona, tanco ca ie vess dic noneta cun la mia.
Parò ie vea ben capii ca: per amarti e uscire sola con te, l’era vargot dapü … ma ie nu rivea mia dree …

Sa pü tard am à pö crumpaa flur da metar gion l’ort o ün qualci vastii par trär ent d’astät, ie l’à dasmancaa, ma ie sà ca am sé tornaa e ciäsa cun ün pescin ross giont ün sachet da plastica plen d’aua. Forza ca me nono al la vess giü vinciü tanco premi dopo veir fac ün quai giögh d’abiltà. Ent l’auto am al vea tacaa sü daspair el balcun e l’ingiäva via e cià ent ogni storta.

Poar pescin, rivaa e ciäsa, am al vea mess giont ün vas radont, al ciapäva ognitant ün zich polvra eposta par i pesc e l’à sciunaa la si vita girand in radond ent al vas sü la meisa da la nossa stüa.

Inciö ie nu ‘l tuless mia pü. Ie ‘l lasciass là e ie ciarcass da dir e quii ch’il dävan in ragal, dal portär indree par ca ‘l possa vivar üna vita decenta ent ün lägh o almeno ent ün pozz adat e lü.

Grazia e quel ca ie vea avdü e santii quel dì là, pü tardi e à impreis du roba:
Nonoleta as scriv: Non ho l’età e l’à mia nagot da fär cun lan nona; gni cun la mia, gni cun quela da la Gigliola Cinquetti!

I bes-c i en mia ün rop da fär spass, da tör e ciäsa, metar ent ün spazi trop pit e pö lasciär là e gnir stüf par al noss divertiment!