Ie à già ciapaa al me prüm ragal da Nadäl

L’é mia al cost o la grandezza ca fann ora al valur d’ün ragal: impurtant l’é ca ‘l toca al cor. Qualci agn fa al consiglio comunale da Visavran al vea mess in vutaziun la proposta da tör davent la brona da Ca d’Zambar (quela sün som al pais) par metar el se post üna ciäsina par al rüt.

L’assemblea dal cumün veil la vea pö er propi aciataa l’idea e inscia i vean töc davent l’aua e lasciaa la brona e sciüc.

Qualci abitant da la fraziun tocäda i vean inura scric el consiglio par dumandär da metar la ciäsina ent ün altar lögh e da lasciär corar inavant l’aua da la brona.

Par diversi agn nu l’é sucess nagot. Qualcian dona da Ca d’Zambar l’àn cuntinuaa ann par ann
e guarnir la brona cun flur, par la tagnir in vita er sa l’aua nu la cantäva plü.

Issa i àn mess ün da quii rop radond par bütär gió la rüzzia 30 o 40 metar pü in sü e inscìa ie à dumandaa el Municipi dal Cumün növ sa am pudess torna veir l’aua. La rasposta l’é giüda positiva! Mia d’invern, parcié ca inura al rivess tropa aua neta or la fogna, ma d’astäd scì…

La brona la tornarà e sprüzzär ora aua neta e där vita e la nossa cunträda, i bes-c e la gent i podarann torna bear ün sluch aua freisca e er as lavär i man senza veir da corar e ciäsa…

Ie augur e tüc da ciapär ragai ca fann ben el cor.

Renata Giovanoli-Semadeni